طفله من يتامى الغاضريه
بالشامات وافتها المنيه
شبگت راس الحسين
والزينب سبتها
طالعت تاريخ عملة كربلا واندهش نوعي
وسهم من گوس المصايب صابني وخيط ضلوعي
ومن دما نحور الضحايه غدت تتواگد دموعي
وشفت الضحايه موزعه والروس منها مگطعه
وشفت الحسين ومصرعه إندهش وضعي وزاد روعي
وگلبي ظل يحوم على الأرامل ونار الخيم تتواگد مشاعل
واحترگت صواوين والزينب سبتها
جني ويا الظعن ساري من تصدى السبي الكوفه
مررونه على المعاره وشفت بيها شلون شوفه
هذا مسحول المفاصل وذاك المگطعه جفوفه
والجثث عريه مخدره وحالة ودايع فاطمه
نشفت من جسمي الدمه وگلبي عالسجاد خوفه
مكسور الگلب والجسم ناحل
من الجامعه وثگل السلاسل
ومگيد المتنين . والزينب سبتها
سايرت سبي الحريم وروحي مسبيه لسبيها
حرم مسبيه وغريبه وبالسياط ملوعيها
شدة الكوفه نستها الشام من بيـّن عليها
جا وين سبع الگنطره ويشوف بالشام إشجرى
وعيال عنده ميسره وبالخرابه منزليها
ومن ضرب العصي صارت علامه بمتون الأرامل واليتامى
وتشاجف بالإيدين والزينب سبتها
فزت من النوم طفله والگلب مجمور يلهب
تشوط نوبه على اليتامه ونوبه تتعلگ بزينب
تصيح ابويه حسين وينه گلبي لفراگه تعطب
يا عمه شفته بنومتي وانمرد جبده الحالتي
وانكسر گلبه الغربتي وبمصيبتنه تصوّب
عمه وصدر ابويه مكسرينه
وليش بدم وريده مغسلينه
والتربان تجفين والزينب سبتها
هيجت نار الگلوب الجامنه بيها عللها
وخلت عيون الفواطم دمعة الغربه تهلها
ورجنت الشام اليساره وبالنحب لمصاب اهلها
صاح ابن هند على الخدم شمروع گلوب الحرم
صيوان عزتها إنهدم خل تنوح الدهر خلها
نادوه اليتيمه تريد أبوها
وبالنوج اليساره يساعدوها
وفاضت دمعة العين والزينب سبتها
صاح يا غلمان هذا الراس ودوه للتريده
وخل تجر لمصابه ونه وتنحب الحزة وريده
وخل تشوف الخيزرانه اشسوت بثغره وتجيده
الله الله اشعمل والراس لعياله انحمل
وخيم على الطفله الأجل وراحت الطفله شهيده
وغمضت عالطشت عين اليتيمه
وصاحت يالعلي والله شمصيبه
وارتجت الكونين والزينب سبتها
إنحنت مفجوعه زينب على الطفله وگلبتها
مالگت روح بجسمها وعلى القبله مددتها
والمصيبه على المغسل صاحت اللي غسلتها
موسومه طفلتكم گضت نادوها من تيسرت
بالخيزران تلوعت والسياط الوسمتها
ومصرع هاليتيمه على اليتامه
مثل مصرع حسين وعمامه
وأثر عالصواوين والزينب سبتها
موضوع: طفله من أيتام الغاضريه 
الخميس مارس 31, 2011 6:17 am
